يمكن الفكرة ماكانت واضحة للجميع . مع أني عم أحكي بالعامية ومع أني بتدايق كتير بتشويه لغتي .
المهم فعل الخير لبعض الناس مثلا يكون بتقديم المال للشحاد . وبس يرجع ع بيتو بحس حالو ملك . وكأنو ماحي كل ذنوبو . أي عمل عالمرتكي أو لا مو عمل . هاد اسمو خلل .
من كم يوم شفت إنسان عندو مشكلة بالمشي وصعوبة بتحريك إيديه وعم يبيع يانصيب . هاد انسان ترفع له القبعة . عم يشتغل بشرف . ولما أنا بدي قدم مال لمحتاج لازم أعرف أنو محتاج . والمحتاج الحقيقي مابيشكي والمفروض تعب حالي شوي وحاول ساعد لما بتكون فعلا النية موجودة وماأنتظر زكاة وفطرة ومناسبات . عمل الخير في كل لحظة من حياتنا لما بكون هدفنا الخير .
بتذكر تماما قديش حكينا عن شرطة المرور وكنا بالشام نقول شرطي أبو 25 . شحاد بس رسمي . كيف حكينا عالشرطي وكيف مامنحكي عالشحادين الحقيقيين؟ . رغم أنو الشرطي لايمكن يعيش إلا إذا اتبع هالطريقة كل يوم .
في خلل بحياتنا وهاد اللي حابة وصلو. نحن مو قادرين نغير شي . طيب منجرب نشعل شمعة . منجرب نزرع وردة . منجرب نحكي وبصوت واحد عن مواقع الخلل ونحارب المافيا والزعران لأن نحن الأقوى . بس بالخير وبالفكر مو بالسلاح والتوحش . وأهم بند لازم نخلص من عقدة أنو مابيجمعنا غير الدين وغير الحزب وغير الفرد وغير تمثال وغير رمز وغير شعار .
خلصنا بقى من هالقصص .
مارح يجمعنا غير العمل والبناء .
الرغبة بالتغيير لصالح الانسان .
نحن كتار بس كل واحد عم يغني لحالو وضروري ننسى دور البطولة ونصير فريق واحد .
بظن فرقة ياني ماكانت ناجحة بياني لحالو . كلهن أبطال . كل عازف آلة عم يقدم نفسو بطريقة فردية مع الجماعة .
وهذا سيل من فيض ......
ومعا للمحبة والسلام .
بقلم : انغريد وطفة
ليست هناك تعليقات:
إرسال تعليق